2Ti 4 | KYG | STEP | Ala kava netimo Yesu Kalaisi'a muki vaya'ai apaulagale'mo afole aiteno agoti huno apateteno'ae'mo vaya'amogitale'mo yagaino lategaiye. Nagaemo agae aulagale'e Goti aulagale'e'mo hu'nae'mo,

2 Timothy 4

Goti ge'amo aeka hakalo huka hapa paiyo, huno ha pai'niya gemae

1 Ala kava netimo Yesu Kalaisi'a muki vaya'ai apaulagale'mo afole aiteno agoti huno apateteno'ae'mo vaya'amogitale'mo yagaino lategaiye. Nagaemo agae aulagale'e Goti aulagale'e'mo hu'nae'mo, 2 Goti ge'amo aeka hakalo huka hapa paiyo. Muki afina'mo gekamo afigefe hisaya kanale'e o'afigefe hisaya kanale'efe'mo alo huka mai'nekae'mo, aise afina'mo hane'niyanagi malage hutapa gemo afiyo, huka hapa paiyo. Apakesa aliteka apave lige'apao. Lapakaemo hosu kava'mo osiyo, huka hapa paiyo. Goti ge'amo akame hisayafe'mo alika he tika apato. Ani kava'mo nehukae'mo yagu yaga kava'mo huka maime maime ne'ukae'mo o'ataleka alika apaya malo. 3 Henaga'a kaita haugekana huno ohane'neno vaya'aina alino hapageno ne'apataya gee'mo ohapaugiya'mofe'mo ani agufa gemo alika apaya malo. Apakai'api nehapaiya kava'mo akame hute'a hapau'niya gemo afisayafe'mo ali'a apaya ne'malaya vaya'mo apavaleli'a ege ege hugae. 4 Lama gelefe'mo apakame'ya amite'a alagepa ka'mo atale'a kaitene gegana agufa gelefe'mo afigae. 5 Afigaya'monanafa kagaemo muki afina'mo alagepa huka kagesamo afi'neka kagaikale'mo alagepa huka yagaika ato. Hanageke ya'mo ne'alikae'mo o'ataleka atafauka alagi huka maiyo. U'e'a hu'a alagepa faigoko gemo ae'a hakalo hu'a hapa nepaiya vaya'mogi ne'aliya agufa ali'ya'mo lokiya vaika aliyo. Goti ali'ya'ale'mo mai'nana ali'yakamo muki agufa kava'alefe'mo aliyo.

Ali'ya'nimo alagi hano hugefe'mo hiye, huno hu'niya gemae

6 Nofi alagafati ani'mo laki'a Goti'mo ofalinimo ne'amiya kava hu'na kola'nimo ai'na laki'na ma mopafi'mo atale'na visuva kana'nimo alagi ago hogo hiya'mofe'mae. 7 Kanale kamemo Goti vaya'amogimo nehaya agufa kamemo ago hu'nove. Nagu nagu hu'na u'na atupale'mo he ti'nove. Apakesa afi'a fatago nehaya gelefe'mo yagai'na ate'nogeno afa'a hane'niye. 8 Hemenimo fatago vaya'mogi alisaya agufa hetama'nimo alino nate'niyanage'na aliguve. Ala kava ne'mo'a agoti gemo alino fatago huno alino fako huno ne'apateya vekamo afole aisiya kanale'mo namigiye. Nagai'nige'mo o'aliguva'monanafa muki vaya'mo eminesiyafe'mo hapau'niya vaya'amogi'e'mo aligune.

Ge atupa gemae

9 Kayamufa valeka nagaetegamo malage huka eno. 10 Nimasi'a ma mopafi yafeke'mo hau'nigeno alagi ago nataleno Tesalonaika taonifi'mo u'niye. Kilesenisi'a Galesiya kotegamo u'niye. Taitasi'a Namalesiya kotegamo u'niye. 11 Luki'a agai'ageke'mo nagae'e'mo lokaeno mai'niye. Maki'a Goti ali'ya'mo ne'alino'ae'mo alagepa huno naha maegaiyanagi avalelika eno. 12 Nagaemo Tikikasi'a ali'na atalogeno Efasasi taonifi'mo u'niye. 13 Ekae'mo nalonoku'nimo Toloasi taonifi'mo Kapasi nopi'mo atale'novanagi aliteka muki muku'a'nimo alinika egana'monanafa sipisipi agufaleti'mo alo hu'naya muku'ni'e'mo lusi kava huno nahau'niyanagi o'ataleka alinateka eno. 14 Alekasani'a aenimo alo nehaya ali'ya'mo ne'aliya vekamo'a nagaetegamo alagi hosu kava'mo hu'niye. Ala kava ne'mo'a anona'alefe'mo alino amigiye. 15 Agaemo lusi kava huno ayamukiki huno lagaemo aeta hakalo huta hapa nepauna gelefe'mo kame huno ate'niyanagi agaefe'mo maika halove nehuka ehekae. 16 Lomu gamani vaya'mogimo hogote afina'mo agotimo hu'a nate'nage'nae'mo naha maesiya gemo nehugeno'ae'mo mago vekamo'a eno naha o'mae'nifa muki vaya'amo ago natale'a u'nae. Inagi Goti'a hosu kava'apimo anona'apilefe'mo o'apamisiyafe'mo nahau'niye. 17 Natale'a u'naya'monanafa Ala kava ne'mo'a nagae nahaopale'mo lokaeno mai'neno'ae'mo muki ge'amo ae'na hakalo hu'na hano hisuge'apae'mo muki alu nofi vaya'mogimo alagepa faigoko ge'amo afisayafe'mo ayamufa huno nate'niye. Laiyonimo'a nahaesiyafe'mo nehigeno'ae'mo Goti'a nagufamo alino katino nate'niye. 18 Inagi Ala kava ne'mo'a muki hosu kavapati'mo nagufamo alino katino nateteno koku'napi'mo yagaino ne'apateya kote'mo navalelino haino nategaiye. Muki afina'mo ha le konali agi'amo alagi hanege hanege huno haneno. He, lama ge. 19 Pilisila'e Akuvila'enagi Onesifolasi afamo anaga'a'enagi hutapa ge apamamaeyo. 20 Ilasatasi'a Kolini taonifi'mo mai'nigeno Tolofimasi'a kaita hau'nige'na Mailitasi taonifi'mo atale'na e'nove. 21 Yasi ne'aliya afina'mo afole aigiyanagi amalageka huka aeka agaseka eno. Yumiyulasi'agi Piyunenesi'agi Lainasi'agi Kiloniya'agi muki konagatimogi'e'mogi hu'a ge nekamamae. 22 Ala kava ne'mo'a kagae'e'mo magokepi'mo lokaeno maino. Goti'a fiku lapa maeno lapamino. He, lama ge.